ஜிவி பிரகாஷ் சைந்தவி பிரிவு.... அதிகரிக்கும் கார்ப்பரேட் காதல் - கே.ராஜன் காட்டம்!

 சினிமாவில் அதிகரித்து வரும் விவாகரத்து பிரச்சனைகள் தமிழ் மக்களிடையே பரபரப்பை உண்டாக்கியிருப்பதாக தயாரிப்பாளர் கே.ராஜன் தெரிவித்துள்ளார்.

மாயோன் சிவா தொரப்பாடி இயக்கத்தில் உருவாகி இருக்கும் படம் 'கன்னி'. இப்படத்தில் அஷ்வினி சந்திரசேகர், மணிமாறன், தாரா க்ரிஷ், ராம் பரதன் உள்ளிட்ட பலர் நடித்துள்ளனர்.

மே 17ஆம் தேதி கன்னி திரைப்படம் திரையரங்குகளில் வெளியாகிறது.  இப்படத்தின் அறிமுக விழா சென்னை பிரசாத் லேபில் நேற்று நடைபெற்றது.

திரைப்பட விநியோகஸ்தர் சங்கத் தலைவர் தயாரிப்பாளர் கே. ராஜன், இயக்குநர் பேரரசு, கன்னி படத்தின் தயாரிப்பாளர் எம். செல்வராஜ், இயக்குநர் மாயோன் சிவா தொரப்பாடி மற்றும் படத்தில் நடித்த அஷ்வினி சந்திரசேகர், மணிமாறன், தாரா க்ரிஷ், ராம் பரதன் ஆகியோர் சிறப்பு விருந்தினர்களாகக் கலந்து கொண்டனர்.

இந்த நிகழ்ச்சியில் கே.ராஜன் பேசியபோது, " தயாரிப்பாளரைப் பணம் கொடுக்கும் கருவூலம் போல நினைக்கிறார்கள். இயக்குநர் மற்றும் தயாரிப்பாளர் இல்லாமல் படம் இல்லை.

தயாரிப்பாளர் காசு போட்டால் தான் எல்லாருக்கும் வேலை. அதேபோல இது போன்ற விழாக்களையும் அவர் தான் நடத்த வேண்டும். இசையமைப்பாளர் ஒரு அறைக்குள் இருந்து மெட்டு போட்டுவிட்டால் அது உலகத்தில் பரவி விடாது.

ஒரு தயாரிப்பாளர் அவருக்கான ட்யூன் வாங்கி கவிஞரை அழைத்து அதற்கான பாடல் வரிகளை எழுத வைக்க வேண்டும். நல்ல பாடகரை வைத்துப் பாடல் உருவாக்கி இசை வெளியீட்டு விழா நடத்த வேண்டும். பின்னர் அதற்குச் சில லட்சம் செலவு செய்து உலகுக்கு அறிமுகப்படுத்த வேண்டும். இவை அனைத்துக்கும் தயாரிப்பாளர் செலவு தான்.

இசையமைப்பாளர் செய்கிற வேலைக்குப் பணம் கொடுத்து விடுகிறார். எனவே பாட்டு முழுவதும் தயாரிப்பாளருக்கு மட்டுமே சொந்தம். பணத்தை வாங்கிக் கொண்டு எனக்கு சொந்தம் சொந்தம் என்று சொன்னால் அது பேராசை. ஆனால், ஒப்பந்தத்தில் அப்படிக் கொடுப்பதாக எழுதியிருந்தால் கொடுத்து விட வேண்டும்.

முதல் போடும் முதலாளிக்குத் துரோகம் செய்துவிட்டு, தான் மட்டுமே சம்பாதிக்க வேண்டும் என்று நினைத்து விட்டதால் இன்று எத்தனையோ படத்தயாரிப்பாளர்கள் வறுமையில் வாடுகிறார்கள். எனவே
அனைவரும் இந்தப் படத்தின் தயாரிப்பாளருக்குத் துணை நின்று படத்தை வெற்றி பெற வைக்க வேண்டும்.

இந்தப் படம் தமிழ்ப் பண்பாடு, கலாச்சாரம் பற்றிப் பேசி இருப்பதால் தமிழ்நாட்டில் சமீப காலமாக நடக்கும் அவலத்தைப் பற்றி நான் சொல்ல வேண்டி இருக்கிறது.

தமிழ்ப் பண்பாடு என்றால் ஒருவனுக்கு ஒருத்தி தான். அதேபோல தமிழ்த் திரை உலகில் பல பேர் காதலித்து வாழ்ந்து கொண்டிருக்கிறார்கள். அதற்கு உதாரணம் எங்கள் பாக்யராஜ். இன்பமான வாழ்க்கையை ஒரு எடுத்துக்காட்டாக வாழ்ந்து கொண்டிருக்கிறார்.

தமிழ்நாட்டு ரசிகர்கள் நடிகர்களைப் பின்பற்றுகிறார்கள் .நடிகர் கிழிந்த பேண்ட் போட்டால் இவர்களும் கிழித்துக் கொள்கிறார்கள். தலை கலைந்திருந்தால் இவர்களும் தலையை கலைத்து விட்டுக் கொள்கிறார்கள்.
ரசிகர்களே இப்படி நடிகர்களைப் பின்பற்றாதீர்கள்.

போன மாதம் தனுஷும் ஐஸ்வர்யாவும் விவாகரத்துக்காக நீதிமன்றம் சென்றிருக்கிறார்கள். தமிழ் மக்களிடம் அது பெரிய பரபரப்பு உண்டாக்கியது. இரண்டு குழந்தைகளை விட்டு விட்டு இப்படிப் பிரிந்து போகிறோம் என்றால் அந்தக் குழந்தைகளின் கதி என்ன?அந்தப் பெண்ணைப் பெற்ற உலகம் அறிந்த மாபெரும் தலைவன் அவரது மனது எப்படி வேதனைப்படும்?

இப்போது பார்த்தால் ஜிவி பிரகாஷ் - சைந்தவி பிரச்சினை. சைந்தவி நல்ல ஒழுக்கமான அருமையான பெண். எனது 'உணர்ச்சிகள்' படத்திற்கு முதல் பாடலைப் பாடினார். காதலித்து தான் திருமணம் செய்து கொண்டார்கள். காதலிக்கும் போது மனதை முழுமையாக புரிந்து கொண்டுதான் காதலிக்கிறார்கள். கல்யாணத்திற்குப் பிறகு ஏன் கசப்பாகப் போகிறது?  விட்டுக் கொடுத்து வாழ்பவர்கள் கெட்டுப் போவதில்லை.

இப்போதெல்லாம் சாப்ட்வேர் கம்பெனிகளில் 15 நாளில் காதல் ,ஒரு மாதம் திருமண வாழ்க்கை, மூன்றாவது மாதம் விவாகரத்துக்கு நீதிமன்றம் செல்கிறார்கள்.

இப்படிப்பட்ட நிலையில் தமிழ் பண்பாடு சித்த மருத்துவம் பற்றிச் சொல்லியிருக்கும் இந்த 'கன்னி' படம் வெற்றி பெற வாழ்த்துகிறேன்'' என்று கே.ராஜன் தெரிவித்தார் .

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்...

ஹெல்த் டிப்ஸ்: வெயிலில் போய்விட்டு வீடு திரும்பியதும் இதெல்லாம் செய்யாதீர்கள்!

என்னென்ன சொல்றாரு பாருங்க: அப்டேட் குமாரு